سامحونى لو كانت كلماتى مبعثرة بلا ملامح فهى كلمات تعكس حالى و حال أمة ....أمة فقدت القدرة على التحكم فى مؤشر بوصلتها حتى صار الهزل و العبث أهون ما تقترفه فى حق اولادها
مصدقتش عينيا و انا بقرا الجرايد ولا و انا بتفرج على برامج التوك شو........أصبحت غزة هى الجانى و نحن المستهدفين، الموضوع دخل فى كلام كبير اووووى "أمن قومى و خيانة عظمى" كأنه أصبح لزاماً عليك يا مصر ان تلوثى فى حرب اعلامية عبثية ضد اهلنا فى غزة
ااااااااااااااااااااااااه يا غزة
غزة المحاصرة من 8 شهور بقدرة قادر اصبحت الفزع الأعظم و الخطر الأكبر بجد يالا سخرية القدر على رأى يوسف وهبى...........الشحن الاعلامى ضاغط و خانق و متواصل ضد غزة و حماس، اشباه الكتاب انبروا فى كتابة عواميد و مقالات و لقاءات تلفيزيونية دفاعاً عن عرض الوطن و حريتهدولارات مزيفة اسرائلية الصنع هل تؤثر على اقتصادنا الوطنى (ال يعنى عندنا اقتصاد لا و ايه وطنى :))
الارهابيون الهاربون .....لن يصدروا مشاكلهم لنا.....حماس الذراع الايرانى على حدودنا
مصر الأخت الكبرة مش للبهدلة......للصبر حدود و لمصر حدود
حسا انى بتفرج على مسرحية هزلية فالبرامج التلفزيونية تندد بالغزو الغزى لمصرنا المحروسة، و ناس المفروض انهم محترمين بيقولوا احنا محررناش سينا عشان الغزاوية يحتلوها و كلاااااااام كتير عن القانون الدولى و حدودنا كدوله مستقلة و طبعاً عن حماس و الأجندة الاخوانية الايرانية و امراء الحرب امثال الزهار و صيام و رفض مصر كدولة ذات سيادة اقامة دولة اسلامية على حدودها لكن عادى نقبل وجود دولة صهيونية يهودية مغتصبة لا و كمان نتفاوض معاهم السلااااااااااااام يا بشر اكيد اولمرت و رفاقه اجدع من بتوع الاسلام الراديكالى .... شوية مصطلحات سمموا بيها عقول الناس حتى صرنا نحن من يعانى من الاسلاموفوبيا و ليس الغرباما قمة الهزل فهم شوية من اهل غزة المنتمين لفتح عباس مش فتح التحرير اللى بيسخنوا المصريين كأنهم لم يعانوا حصار و لم يدخلوا مصر و لما المعبر اتفتح قفلوا على نفسهم باب الغرف حتى يعيشوا جو الحصار و ختمها السيد عباس اللى فى عز ضلمة غزة راح يتعشى مع اولمرت فى نفس الوقت رافض انه يقعد مع خالد مشعل او اى من قيادات حماس عشان انقلبوا على الشرعية و احتلوا غزة مش بقولكم قمة الهزل
لكل الأخوة بتوع الأمن القومى غزة صمام امانا مش المعاهدة "عمر اليهود ما كان ليهم عهد" غزة هى الشوكة اللى فى حلق اليهود لو قضى عليها لم يبقى غيرنا "من النيل للفرات"
للبهوات بتوع القانون الدولى أهل فلسطين و غزة بيحموا مقدساتنا و أرضنا المغتصبة فلسطين اسلامية عربية مش بتاعة الفلسطينين لوحدهم.....الأقصى هو اولى القبلتين، ثالث الحرمين و مسرى النبى صلى الله عليه و سلم.....بيت لحم هى مسقط رأس المسيح عليه السلام مش بلدهم يعنى نسيبهم يولوعوا فيها و كل واحد يشوف امنه القومى
فى تجاوزات اكيد فيه لكن
بيع الحاجة ب3 اضعاف تمنها كان اسمه ايه؟
غلق المعبر 8 شهور اسمه ايه؟
وفاة حجاج فى عرض البحر شو بتسموه يا مصريين؟؟؟
صحيح زمن قل فيه الرجال
بالمناسبة فتح المعبر او كسره سموه ما شئتم لم يحل الأزمة و لم يلغى الحصار....فالحصار قائم و التوغل الصهيونى لن ينتهى و الاغتيالات و الاعتقالات مستمرة
و الظلام مازال يسيطر على قلوبنا و عقولنا
هناك تعليقان (2):
المدونة خطوة مهمة جداً بل و هدف نبيل يجب أن يستمر
لكن قولي لي .. كيف أستطيع أن اعطي ولو القليل لدعم هذه المدونة؟
بارك الله فيكِ أختنا الكريمة.
تدعمى المدونة...بالآتى إن شاء الله:
- المساعدة فى نشرها والعمل على إنتشارها.
- متابعة المدونة بشكل منتظم.
-إرسال اى تعليقات لنا...لتحسين مستوى المدونة.
بورك مسعاكِ :)
إرسال تعليق